Германияда келиб чиқиши тожикистонлик бўлган тўрт фуқоро терактга тайёргарлик кўриш гумони билан ушланди. Полиция 15 апрел куни эрталаб Шимолий Рейн – Вестфалия минтақасида уларни ушлаш амалиётини ўтказди. Ушланганлар “Ислом Давлати” (ИД) гуруҳининг аъзолари экани айтилмоқда.
ГФР Бош прокуратураси чоршанба куни ушланганларнинг исмларини эълон қилди. Улар – Тожикистон фуқоролари Азизжон Б., Мухаммадали Г., Фарходшоҳ К., Суннатуллоҳ К.
Тожикистон расмийлари, жумладан Тожикистоннинг Германиядаги элчихонаси ҳозирча ўз фуқороларининг ушлангани юзасидан изоҳ бермади. Тожикистон хукумат тузилмаларидаги манбанинг хабар қилишича, ГФР расмийлари уч кун мабойнида Тожикистон элчихонасига мамлакатда ўтказилган амалиёт ҳақида маълум қилишлари керак.
Маҳаллий ОАВнинг хабар қилишича, ИДнинг эҳтимолий аъзолари 15 апрел куни Эссен ваДюссельдорф шаҳарлари яқинида ушланган.
Полиция хабарига кўра, ушланган тўрт киши ўзларининг сўнги йилларда панжара ортида бўлган бешинчи ҳамроҳи билан Афғонистон ва Суриядаги ИД раҳбарияти етакчилари билан алоқа ўрнатган ва улардан кўрсатма олиб турган.
«Бўлажак ҳужумларнинг нишони Германиядаги АҚШ кучларининг муассасалари, ёки алоҳида олинган фуқоролар бўлган. Жумладан, уларнинг наздида исломни танқид қилиб фикр билдирган шахсларни ўлдириш режалаштирилган эди», – дея хабар беради Der Spiegelга Германияполицияси.
Терговчиларга таянган ҳолда нашрнинг ёзишича, ушланганлар аввалига маҳалий хукуматга қарши курашиш учун Германиядан Тожикистонга кетишмоқчи бўлган, бироқ кейинчалик Германияда қолиб, шу ерда бир нечта теракт уюштиришга қарор қилишган. Полиция амалиёт вақтида қўлбола портловчи мослама учун компонентлар мусодора қилинганини маълум қилди.
Германия полициясининг таҳмин қилишича, гуруҳ раҳбари бир йил муқаддам қўлга олинган Тожикистоннинг бошқа бир фуқороси – Равшан Б. ҳисобланади.
2015 йилда муҳолифатдаги «24 Гуруҳи»ва Тожикистон Ислом Уйғониш партияси (ТИУП) фаолияти Тожикистонда тақиқланганидан сўнг мамлакатнинг юзлаб фуқоролари Европа Иттифоқи, жумладан Германияга келди.
Эслатиб ўтамиз, ўтган йилнинг март ойида ГФР полицияси мамлакат ғарбида терактга тайёргарлик кўрганликда гумон қилинган Тожикистон фуқоролари ушлангани борасида маълум қилган эди. Бу ерда гап, асосан тожикистонлик бўлган10 кишидан иборат гуруҳнинг терактга тайёргарлиги ҳақида бормоқда. Уларни ушлаш амалиётлари Шимолий Рейн-Вестфалия ваБаден-Вюртемберг федерал ўлкаларида ўтказилган аксилтеррор рейдлари давомида бўлиб ўтди. Ўшанда ушлашларга Эссендаги ҳодиса сабаб бўлгани айтилган эди, бу шаҳарда 19-ёшли тожикистонлик ҳайдовчи катта тезликда машинани пиёдалар зонасига ҳайдаб борган эди. Ҳодисада ҳеч ким зиён кўрмади.
Орадан бир неча кун ўтиб Германия расмийлари терроризмда гумон қилиниб ушланган Тожикистон фуқоролари озодликка чиқарилгани, бироқ уларга нисбатан тергов давом этишини билдирган эди.
